АҚШ президенті Дональд Трамптың Иранға қарсы ең қуатты ядролық емес бомбаны қолдану мүмкіндігін растауынан кейін, Тегеран өз арсеналында бұдан да қуатты қару бар екенін мәлімдеп, қарсы ескерту жасады.
Бұл туралы Tengrinews хабарлайды.
АҚШ әкімшілігінің Иранға қарсы GBU-43/B (MOAB) ядролық емес бомбасын қолдану мүмкіндігін қарастырып жатқаны туралы ақпаратты CNN және CBS News телеарналары таратты. АҚШ президенті Дональд Трамптың өзі бұл қаруды қолдану ықтималдығын растады.
Бұл мәлімдемелерге қатысты Иран тарапынан қатаң жауаптар айтылды. Иран Ішкі істер министрлігінің өкілі Әли Зейнивандтың айтуынша, Иранда АҚШ-тың «барлық бомбалардың анасы» деп аталатын бомбасынан қуаттырақ қару бар. Ол мұны «барлық бомбалардың әжесі» деп атады. Айта кетейік, 2017 жылы ИИРК Әуе-ғарыш күштерінің бұрынғы қолбасшысы Әли Хаджизаде Иран «барлық бомбалардың әкесі» деп аталатын ауыр ядролық емес бомба жасап шығарғанын мәлімдеген еді.
Иранның ұстанымы
Ирандық шенеуніктер АҚШ-тың ықтимал әскери әрекеттерінің тиімділігіне күмән келтіреді. ИИРК өкілі Хосейн Мохебидің пікірінше, MOAB бомбасын қолдану Иранның ядролық бағдарламасын тоқтата алмайды, елді тізе бүктірмейді және Ормуз бұғазын ашуға мәжбүрлемейді.
Иранның қорғаныс министрі міндетін атқарушы Сейед Маджид Ибн ар-Реза бомбалардың атауы мен көлемі емес, оның салдары маңызды екенін атап өтті. Оның ескертуінше, мұндай шабуыл АҚШ-тың халықаралық беделіне, экономикасына және сайлау алдындағы есептеріне кері әсерін тигізеді.
АҚШ-тың MOAB бомбасы. Мұрағат, 2003 жыл. Фото: АҚШ Қорғаныс министрлігі / Wikimedia Commons (Public domain). Дереккөз