Google-де жылына жарты миллион доллар тапқан кыргызстандық инженер Таалай Джумабаев корпоративтік мансабын тастап, Орталық Азия мектептерінде информатиканы оқытуды цифрландыруға кірісті.
Бұл туралы Digital Business хабарлайды.
Кыргызстандық бағдарламашы Таалай Джумабаев бұрынғы мансаптық жолында Deutsche Bank және Google сияқты ірі корпорацияларда жұмыс істеген. Ол Google-дің Ad Manager бөлімшесіндегі Insights & Opportunities өнімімен айналысып, жылына 500 мың долларға дейін табыс тапқан, деп хабарлайды Digital Business. Алайда 2023 жылы ол корпоративтік сектордан кетіп, білім беру технологиялары саласына ауысты.
Джумабаевтың жаңа жобасы — мектептердегі информатика сабақтарына арналған LUWO интерактивті платформасы. Бұл жобаны іске қосу үшін ол 350 мың доллар көлемінде жеке қаражатын жұмсады. Сонымен қатар, стартап сырттан 415 мың доллар инвестиция тартты.
Инвестициялық құрылым және даму жолы
LUWO жобасына тартылған инвестициялар бірнеше көзден түсті:
- Astana Hub Ventures қоры 1% үлес үшін 120 мың доллар құйды (бағалау лимиті 12 млн доллар).
- CS Angels бизнес-періштелер клубы 100 мың доллар инвестициялады.
- Тағы 195 мың доллар SAFE келісімі бойынша тартылды (бағалау лимиті 5 млн доллар).
Жалпы алғанда, жарияланған уақытқа дейін платформаны әзірлеуге және іске қосуға шамамен 500 мың доллар жұмсалған. Жобаның бас кеңсесі АҚШ-тың Делавэр штатында тіркелген, ал Қырғызстан мен Өзбекстанда еншілес құрылымдары жұмыс істейді.
Орталық Азия нарығындағы қызметі
LUWO платформасының әзірлеу жұмыстары 2025 жылдың желтоқсанында басталып, 2026 жылдың мамырында «Илим» жеке мектебінде алғашқы сынақтан өтті. Қазіргі таңда платформа Қырғызстан, Өзбекстан, Қазақстан және Тәжікстандағы 100-ден астам мектепке қосылған. Келісімшарттар бойынша 26 мың оқушы қамтылған.
Бизнес-модельге сәйкес, алғашқы қосылған мектептер үшін платформаны пайдалану құны бір оқушыға жылына 20 долларды құрайды. Бұл баға алдағы 5 жылға бекітілген.
Айта кетейік, LUWO-ға дейін Джумабаев АҚШ-та IT-мамандарды даярлайтын GrowthHungry Academy менторлық академиясын іске қосқан болатын.
Таалай Джумабаев. Фото: digitalbusiness.kz. Дереккөз